సీతారామ లిఫ్ట్ పంపుహౌస్ పరిశీలించిన జిల్లాకలెక్టర్
✍️ అశ్వాపురం – దివిటీ (జూన్ 28)
అశ్వాపురం మండలంలోని బీజీకొత్తూరు సమీపంలోని సీతారామ ఎత్తిపోతల పధకం పంపుహౌస్ ను భద్రాద్రి కొత్తగూడెం జిల్లా కలెక్టర్ జితేష్ వి పాటిల్ శుక్రవారం సందర్శించారు. ఈ సందర్భంగా ఇంజనీరింగ్ విభాగం అధికారులు ఆయనకు మ్యాప్ ద్వారా ఆ ప్రాజెక్టుకు సంబంధించిన వివరాలు తెలిపారు. ఈ పంపు హౌస్ ద్వారా 1500 క్యూసెక్కుల నీరు వస్తుందని, భద్రాద్రి కొత్తగూడెం జిల్లాలో మొత్తం 4 పంపుల ద్వారా 104 కిలోమీటర్లు నీరు పంపేందుకు ప్రధాన కాలువ సిద్ధంగా ఉందని వెల్లడించారు. ఈ సందర్భంగా ఆగస్టునెలలో నీరు విడుదల చేసేందుకు పనులన్నీ పూర్తిచెయ్యాలని అధికారులను కలెక్టర్ ఆదేశించారు. ఈ కాలువ ఏన్కూరు వద్ద నాగార్జునసాగర్ కాలువకు అనుసంధానం చేయబడుతుందని, తద్వారా ఉమ్మడి ఖమ్మం జిల్లాలో 1.20లక్షల ఎకరాలకు మొదటి విడతగా నీటిలభ్యత కల్పించబడుతుందని తెలిపారు. ఈ విధంగా రాబోయే మూడు సంవత్సరాల్లో విడతల వారీగా సీతారామ ఎత్తిపోతలపథకం పూర్తిచేసి ఖమ్మం, భద్రాద్రి కొత్తగూడెం, మహబూబాబాద్ జిల్లాల్లో 6.74 లక్షల ఎకరాలకు నీరందించబడుతుందని కలెక్టర్ తెలిపారు. ఈ కార్యక్రమంలో నీటిపారుదల శాఖ చీఫ్ ఇంజనీర్ శ్రీనివాసరెడ్డి, సూపరిండెంట్ ఇంజనీర్లు వెంకటేశ్వరరెడ్డి, శ్రీనివాసరెడ్డి, కార్యనిర్వాహకఇంజినీర్ వెంకటేశ్వరరావు తదితరులు పాల్గొన్నారు.
