జిల్లాలో 57,983 మంది రైతులకు రూ.415.35కోట్ల
రుణమాఫీ
భద్రాద్రి కొత్తగూడెం జిల్లా కలెక్టర్ జి.వి.పాటిల్ వెల్లడి
రైతుల ఇబ్బందులు గ్రీవెన్స్ పోర్టల్ ద్వారా పరిష్కారానికి చర్యలు
✍️ భద్రాద్రి కొత్తగూడెం – దివిటీ (ఆగస్టు 17)
రైతు రుణమాఫీలో భాగంగా భద్రాద్రి కొత్తగూడెం జిల్లాలో మూడు విడతల్లో 57,983 మంది రైతులకు 415 కోట్ల 34 లక్షల 84 వేల 332 రూపాయలు రైతుల ఖాతాల్లో జమ చేసినట్లు జిల్లాకలెక్టర్ జితేష్.వి.పాటిల్ ఓ ప్రకటనలో పేర్కొన్నారు. ప్రభుత్వం మార్గదర్శకాల ప్రకారం అర్హత కలిగిన ప్రతిరైతుకు రుణమాఫీ తప్పక జరుగుతుందని తెలిపారు. మొదటివిడత రుణమాఫీ లో 28,801మంది రైతులకు 136కోట్ల 64లక్షల 86 వేల 132రూపాయలు, రెండోవిడతలో 17309మంది రైతులకు 147కోట్ల 33లక్షల 79వేల 632రూపాయలు, మూడో విడతలో 11873మంది రైతులకు 131కోట్ల 36లక్షల 18వేల 568రూపాయలు రుణమాఫీ నగదు రైతులఖాతాల్లో జమచేసినట్లు తెలిపారు. వ్యవసాయ,
సహకారశాఖలలో పంట రుణాలు రుణమాఫీ- 2024 ఫిర్యాదుల నమోదు, పరిష్కారానికి మార్గదర్శకాలు, సూచనలను కలెక్టర్ ప్రకటించారు.
1. మండలంలో ఉన్న అన్ని బ్యాంకుశాఖలు/ సహకార సంఘాల రుణాలకు మండల వ్యవసాయ అధికారి బాధ్యత వహిస్తారు.
2. ఫిర్యాదులొచ్చిన సందర్భాల్లో మండల వ్యవసాయ అధికారి తప్పనిసరిగా ‘www.clw.telangana.gov.in‘ పోర్టల్ లో రైతు సమాచార పత్రాన్ని యాక్సెస్ చేయాలి. రైతు సమాచార పత్రం కాపీని రైతుతో పంచుకోవాలి.
3. ఆధార్ తప్పుగా ఉన్న సందర్భాల్లో మండల వ్యవసాయాధికారులు తప్పనిసరిగా రైతు నుంచి ఆధార్ కార్డు కాపీని పొందాలి, పోర్టల్లో సరైన ఆధార్ అప్లోడ్ చేయాలి. ఓటరు కార్డు, వాహన లైసెన్స్, రైతు రేషన్ కార్డు వంటి ప్రత్యామ్నాయ గుర్తింపు పత్రాన్ని సేకరించి అప్లోడ్ చేయాలి.
4. కుటుంబాలు ఇంకా నిర్ణయించబడని సందర్భాల్లో మండల వ్యవసాయ అధికారులు తప్పనిసరిగా రైతు ఇంటిని సందర్శించి, రైతు వెల్లడించిన ఆధార్ కాపీలు, కుటుంబసభ్యుల సంఖ్యను తప్పనిసరిగా తీసుకోవాలి. కుటుంబ వివరాలను మండల వ్యవసాయాధికారుల ద్వారా తప్పనిసరిగా పోర్టల్లో అప్డేట్ చేయాలి.
5. రైతుకు రైతు పాస్బుక్ లేని సందర్భాల్లో, రైతు నుంచి పొందిన తర్వాత దానిని పోర్టల్లో అప్లోడ్ చేయవచ్చు.
6. ఆధార్లో పేరు, లోన్ ఖాతాలో పేరు మధ్య లోపాలు, తేడాలు ఉన్న సందర్భాల్లో, రుణం తీసుకున్న వ్యక్తి గుర్తింపును ఏర్పాటు చేయాలి. రుణం తీసుకున్న వ్యక్తికి సంబంధించిన సరైన ఆధార్ నంబర్ను పోర్టల్లో అప్లోడ్ చేయాలి.
7. అసలు, వడ్డీ మొత్తంలో సరిపోని పక్షంలో, రైతు నుంచి ఒక దరఖాస్తు తీసుకుని, వివరాలను క్లుప్తంగా పేర్కొంటూ పోర్టల్లో అప్లోడ్ చేయవచ్చు. నిర్ధారణ, దిద్దుబాటు కోసం అదే సంబంధిత బ్యాంకుకు పంపించబడుతుంది.
8. పైన పేర్కొన్న కార్యకలాపాలలో పోర్టల్లో నవీకరణ ఉంటుంది కాబట్టి, పోర్టల్ త్వరలో నవీకరించబడిన తర్వాత ప్రస్తుత ధరఖాస్తులు, పత్రాలను సేకరించి అప్లోడ్ చేయవచ్చు.
Save or share this story as a newspaper-style Epaper Clip:
