నవంబర్ 4న ఉమ్మడి జిల్లా పాఠశాలల ఆర్చరీ క్రీడాకారుల ఎంపికలు
✍🏽 దివిటీ మీడియా – క్రీడా విభాగం
ఉమ్మడి ఖమ్మం జిల్లా అండర్-14, 17 బాల బాలికల విలువిద్య (ఆర్చరీ) క్రీడాకారుల
ఎంపికలు నవంబర్ 4వ తేదీన కిన్నెరసాని స్పోర్ట్స్ స్కూల్ లో నిర్వహించనున్నామని భద్రాద్రి కొత్తగూడెం జిల్లా విద్యాశాఖాధికారి వెంకటేశ్వరాచారి, ఉమ్మడిజిల్లా పాఠశాలల క్రీడాకార్యదర్శులు కె.నర్సింహామూర్తి, స్టెల్లా ప్రేమ్ కుమార్ ఒక ప్రకటనలో పేర్కొన్నారు. ఈ ఎంపికల్లో పాల్గొనాలనే ఆసక్తి కలిగిన అండర్-14, 17 క్రీడాకారులు 4వ తేదీన ఉదయం 9 గంటలకు తమ సొంత కిట్టుతో ఎంపికలకు కిన్నెరసానిలో హాజరుకావాలని కోరారు. అండర్-17 క్రీడాకారులు ఈ విద్యా సంవత్సరంలో 6వ తరగతి నుంచి ఇంటర్ ఫస్టియర్ లోపు చదువుతూ 2007 జనవరి 1 తర్వాత జన్మించినవారై ఉండాలన్నారు. 9,10వ తరగతులలో చదువుతున్న వారు పాఠశాల ప్రధానోపాధ్యాయుల ద్వారా స్టడీ సర్టిఫికెట్, ఆధార్ కార్డు జిరాక్స్ తీసుకొని రావాలని సూచించారు. ఇంటర్మీడియట్ ప్రథమ సంవత్సరం చదువుతున్న వారైతే 10వ తరగతి ఇంటర్నెట్ మెమో డౌన్ లోడ్ చేసుకుని, ఆ కళాశాల ప్రిన్సిపాల్ సంతకం చేయించుకుని, కళాశాల బోనఫైడ్ పత్రం, ఆధార్ కార్డు జిరాక్స్ తీసుకొని రావాలని కోరారు. అండర్-14 క్రీడాకారులు ఈ విద్యా సంవత్సరంలో 6వ తరగతి నుంచి 9వ తరగతి లోపు చదువుతూ 2010 జనవరి 1 తర్వాత జన్మించినవారు మాత్రమే అర్హులని తెలిపారు. పైన పేర్కొన్న ధ్రువీకరణపత్రాలు తీసుకొని రానివారిని ఎట్టి పరిస్థితుల్లోనూ ఎంపికలకు అనుమతించబోమని వారు ఆ సంయుక్త ప్రకటనలో పేర్కొన్నారు. ఉమ్మడి ఖమ్మం జిల్లాలో ఉన్న పీఈటీలు, పీడీలంతా ఈ నియమనిబంధనలు పాటిస్తూ తమ క్రీడాకారులు హాజరయ్యేలా చూడాలని, ఇతర వివరాలకు 9398284976 నెంబర్ లో మారెప్పను సంప్రదించాలని కోరారు.
